عمل اسود









عمل اسود


عمل اسود



استلقى على فراش بسيط في بنسيون محمود العتيق في الإبراهيمية.. ثم قام وفتح شرفته البسيطة المطلة على البحر.. نظر بجواره للشرفة الخالية التابعة للفندق.. اطمأن أن لا أحد هنا.. قرّبها سيجعل الصوت واضحا.. نَظَرَ للقمر.. والشوارع الفارغة قبيل فجر الإسكندرية المنعش.. أشعل عود بخور زكي الرائحة.. أخرج زجاجة الخمر وسلة فارغة من حقيبته الرياضية وشفرة حلاقة وورقتين فارغتين.. قرأ المعوذتين وأخرج ورقات مطبوعة طبعها في مكتبه في القاهرة قبل السفر.. وبدأ القراءة.



"قبل صلاة الفجر بساعة وأمام البحر في مكان مغلق.. ويوم اكتمال القمر.. أطفئ الأنوار.. أشعل بخور عين الجان الموجود في كل مكان.. "ضع ورقتين في سلة خوص فارغة وأمسكها بيدك اليسرى.. بيدك اليمنى ارسم نجوما خماسية سبعة مرّات وقل سبع مرات: إنه من سليمان وأنه بسم الله الرحمن الرحيم ألا تعلوا عليّ بقوة الرحمن ملك الإنس والجان.. الآن تحضر في المكان... أه ه ه ه ه ه إحضر... يا جان يا طيبين بحق الأحياء والميتين.. انسوا وحدتي خدّاما آمنين... آمييييين اجرح نفسك واخلط دمك بخمر وارسم نجمة خماسية بالدم والخمر على إحدى الورقتين.. عند اضطراب الورق في السلة لا تجزع لقد آتاك ...".


قرأها ثلاثا بهدوء وتوتر وغضب.. وجرّبها ثلاثا بالدم المختلط بعرق التوتر.. اضطراب الورق حدث ولكنه طبيعي بسبب هواء البحر.. نظر لرسغه المليء بالجروح.. وعاد واستلقى على الفراش وبكى.. سمع الأذان... قام توضأ وصلّى.. وبكى وصلّى وقام.



جلس في إحدى مقعدي الشرفة ناظرا للبحر.. نظر أمامه فوجد رجلا أشيب جالسا في الكرسي المقابل.. إحساس الذعر انتابه فانتفض من جلسته..
- إنت لسه هتتخضلي؟ مش إنت اللي محضرني.
- أنا ماتخيلتش إنك هتيجي.. إنت جني؟
- أيوة يا عم جنّي مالك.. فيه إيه سايب بلدك وجاي هنا تقرفني ليه.
- أنا جرّبت كل طرق النجاح وفشلت عملت كل حاجة ممكن تتخيلها.. اشتغلت مندوب مبيعات وكول سنتر و..
- وفشلت.. طلباتك؟



- مش عارف أحدد دلوقتي أنا عاوز إيه.. طول عمري بحلم بفانوس سحري أدعكه يطلعلي المارد أطلب الأمنيات.. وأنا صغيّر كانت أحلامي بلايستيشن و موبايل وامتحانات الثانوية العامة.. كبرت شوية بقت أحلامي شقة وعربية ونص مليون جنيه.. بعدها بسنتين أبويا مات ساب أرض بعتها وبقى عندي شقة وعربية ونص مليون جنيه.. يومها كان حلمي بدل النص مليون جنيه أبويا يرجع يعيش معايا.. النهاردة اترفدت من الشغلانة رقم تسعة في حياتي.. ومراتي طلبت الطلاق لأنها زهقت من فشلي.. مع إني بحاول وبسعى وبتعب و...
- إنت عندك كام سنة ؟
- تلاتين سنة
-جبت طريقة تحضيري منين ؟


- من جوجل.. كتبت طرق تحضير الجان الطيبين للمبتدئين.. ظهرت شوية نتايج اخترت واحدة وطبعتها من منتدى فتكات.


- و جبت طرق صرفي ولا هتخليني قاعد معاك؟
- أخ خ خ ... أنا نسيت الجزء ده.. بعدين إنت بتكلمني كده ليه... إنت جني مجنون ولا إيه أنا هنا مسخرك.. استنى هقولك طلباتي و..


- مسخرني ياد يا فاشل يابن الجزمة.. صب لي كاس من القرف اللي بتشربه ده، ولا بلاش ده إنت متهبب عليه وحاطط دم.. بص.. الحقيقة إن مراتك ليها حق تسيبك.. إنت فاشل في كل حاجة.. فاشل ومتواكل من صغرك... وبتستسهل كل حاجة حتى تحضير الجان جبته من منتدى فتكات.. وفاكر إن هيجيلك جان.. وكمان نسيت تجيب إزاي تصرفه.
- ما إنت جيت


- جيت إيه يا أهبل فيه جني بيلبس روب على بيجامة كستور وشبشب بصباع.. أنا اللي في الأوضة اللي جنبك ونطيت من البلكونة لما سمعت هبلك.. وقولت أشوف أي أكشن يكسر ملل أجازتي وأنا وحدي.. افتكرتك ساحر بجد.. أنا داخل أنام وإياك أسمع صوتك.. ارجع بوس إيد مراتك إنها مستحملة راجل بيفتح منتدى فتكات.


عاد واستلقى على فراشه بعد انصراف الزائر الغريب.. هنا ظهر بخور كثيف في الغرفة وسمع صوت يرج أركانها.. عبوووود .. الخادم الودود أصبح الآن موجودا.. مزيد من الدماء من رقبة السيد أريد الحصول عليها قبل بدأ العمل - هاااار إسود ...


إرسال تعليق

0 تعليقات